Í dag hefur verið glens og gaman í leikskólanum vegna 19 ára afmælis Fífuborgar. Hætt var við að skrifa undir samning um grenndarsvæði sökum veðurs og verður það gert síðar. Í staðinn slógum við upp balli þar sem allir dönsuðu af krafti undir blikkandi diskóljósum. Einnig sýndu starfsmenn leikrit um Búkollu og vakti það mikla lukku meðal barnanna. Að lokum gæddu sér allir á ljúffengri pizzu!

Myndir frá deginum eru komnar á myndasíðuna.

Á hurðum deilda hangir nú könnun um sumarleyfi. Foreldrar eru beðnir um að merkja við hvaða 4 vikur þeir óski eftir að barn þeirra verði í fríi í sumar. Út frá því mun foreldraráðið ákveða hvaða daga leikskólinn verður lokaður í sumar. Leikskólinn mun loka í rúmar tvær vikur en öll börn verða að taka 4 vikur samfellt í sumarleyfi.

Þetta er einungis könnun og skráningin því ekki bindandi. Mikilvægt er að sem flestir taki þátt svo niðurstöður verði marktækar. Síðasti séns til að skrá er föstudaginn 27. janúar.